தமிழர்கள் உலகம் முழுவதும் வாழுகின்றனர். பல்வேறு மொழிகளைப் பேசுகின்றனர். பல்வேறு கலை, இலக்கியம், பண்பாடுகளோடு - பொருந்திப்போய் வாழுகின்றனர். பல்வேறு செயற்பாடுகளில் ஈடுபடுகின்றனர்.

பூமிப் பந்தின் வெவ்வேறு பகுதிகளிலும் நம்தமிழர்கள் இடைவிடாது இயங்கிக் கொண்டுதான் இருக்கின்றனர். அறிவியல், தொழில் நுட்பம், இசை, விளையாட்டு எனப் பல துறைகளிலும் சிறப்பாகச் செயற்பட்டுச் சாதனையாளராகவும் உயர்ந்து கொண்டுதான் இருக்கின்றனர்.

1. யார் இந்தச் சாதனையாளர்கள் ?

2. எங்கு இந்தச் சாதனையை நிகழ்த்தி வருகிறார்கள் ?

3. அவர்களது கண்டுபிடிப்புகள்தான் என்ன ?

ஆற்றலோடு இயங்குகிற இவர்களது பதிவுகள் நம் தமிழ்மக்கள் அனைவருக்கும் சென்றடைவதில்லை. "எனக்குப் புகழ் பிடிக்காது. நான் என் பணியைச் செய்கிறேன். இதுவே போதும்" - என்று ஒதுங்கியே இருக்கிறார்கள் இவர்கள். கணினித் துறையிலும், தொழில் நுட்பத் துறையிலும் கண்டுபிடிக்கிற, ஆற்றுகிற இவர்களது செயற்பாடுகள் பரவலாக்கப்படவில்லை. பதிவு செய்யப்படவில்லை.

இந்தப் பதிவு சுயநலம் பேசுகிற பதிவு அல்ல. தமிழர்களது பல்துறை ஆற்றல்களை காட்சிப்படுத்துகிற, வெளிப்படுத்துகிற, பரவலாக்குகிற, ஆவணப்படுத்துகிற உயரிய செயல்.

இப் பதிவுகளின்வழி நாம் நமது இளைய தலைமுறையினரை முறைப்படுத்தி, ஊக்கப்படுத்தி, ஆற்றுப்படுத்தலாம். என் முன்னோர்கள் இதனைச் செய்துள்ளார்கள். நான் இதனைச் செய்வேன் என்று மேலெழுகிற செயலுக்கு அடித்தளம் அமைத்துக் கொடுக்க உதவலாம்.

www.thamizham.net இந்தப் பதிவைச் செய்ய விரும்புகிறது. பார்வையாளர்களும், நட்பு இணையதள அமைப்பாளர்களும் இச் செய்தியினைப் பரவலாக்கி, அல்லது இக்கட்டுரையைத் தங்களது இணையத்தில் இணைத்துப் பரவலாக்கி, நம் தமிழர்கள் பற்றிய சிறப்புகளைத் தொகுக்க உதவவும்.

தமிழர்கள் பற்றிய குறிப்புகளை......

1. சாதனைத் தமிழர்களின் பெயர், புகைப்படம்.

2. முகவரி

3. செயற்பட்ட துறை

4. செயற்பாடு பற்றிய குறிப்பு

5. பிற செய்திகள்

எனத் தொகுத்து அனுப்பவும். கண்டுபிடிப்புகள், செயற்பாடுகள், சாதனைகள், பற்றிய புகைப்படங்களை jpeg file ஆக்கி மின்அஞ்சல் செய்யவும்.

பூமிப்பந்தில் பரவிக் கிடக்கிற நம் தமிழ் மக்கள் தற்பொழுது இயங்காமல் இல்லை. ஏகப்பட்ட பொருளிழப்பில் ஒவ்வொருவரும் இயங்கிக் கொண்டுதான் இருக்கிறார்கள்.

1. கோயில்களைக் கட்டுகிறார்கள்.

2. நினைவு மண்டபங்களைக் நிறுவுகிறார்கள்.

3. தனிமனித துதிபாடும் விழாக்களை நடத்துகிறார்கள்.

4. தனிமனிதனை அழைத்துக் கொட்டிக் கொடுக்கிறார்கள்.

5. திருமணநாள், பிறந்தநாள் விழா எனச் செலவழிக்கிறார்கள்.

இவையணைத்தும் எதிர்காலத் தலைமுறையினரை எந்த வகையில் " அறிவோடும், ஆற்றலோடும் " வளர்த்தெடுக்கும் படிக்கட்டுகளாக இருக்கும் என்பதைச் சிந்திக்க வேண்டும்.

வேரையும் வேரடி மண்ணையும் சரிசெய்யாது - என்றாவது ஒருநாள் நீரூற்றிப் பயன் என்ன ?

உலக அளவில் நம்தமிழ் மழலையர்களது ஆற்றல்களை வளர்த்தெடுக்கவும், பின் வருகிற தலைமுறையினருக்கு அறிமுகப்படுத்தி வளர்த்தெடுக்கவும் நாம் செய்யவேண்டியன நிறைய உள்ளன.

1. உலக அளவில் தமிழ்ப் பள்ளிகளை ஏற்படுத்துதல். நடந்து கொண்டிருக்கிற தமிழ்ப் பள்ளிகள் பற்றிய குறிப்பினை மாணவர்களது படங்கள், ஆசிரியர் படம், பள்ளி பற்றிய குறிப்பு ஆகியவற்றை இணைத்தல்.

2. உலக அளவில் இயங்குகிற பல்துறை வல்லுநர்களை அவர்களது செயற்பாடுகளை புகைப்படங்களுடன் இணையத்தில் இணைத்து ஆவணப்படுத்துதல்.

3. தமிழ் மக்களது கலை, இலக்கிய பண்பாட்டினைத் தொகுத்து ஆவணப்படுத்துதல்.

4. உலக அளவில் இயங்கிக் கொண்டிருக்கக்கூடிய நூலகங்கள், வெளிவரக்கூடிய, வந்த தமிழ் சஞ்சிகைகள், நூல்கள் போன்றவற்றைத் தொகுத்து - வரிசைப்படுத்தி - ஆவணப்படுத்துதல்.

குறைந்த செலவில், நொடிப்பொழுதில் கலந்துரையாட, பகிர்ந்துகொள்ள - உதவுகிற அறிவியலின் உயரிய தொழில் நுட்பம்தான் இந்த இணையதளம்.

இந்த இணையதளம் மேலே குறிப்பிட்டுள்ள கருத்துகளோடு ஒத்ததிர்வு உடைய நண்பர்களை இணைத்துச் செயலாற்ற உதவுமா ?

இணையதளம் இணைக்குமா ?

- பொள்ளாச்சி நசன் -

ooo

காசி ஆனந்தன் ஹைகூ கதைகள்

தேவை

புல் மேய்ந்து கொண்டிருந்தது மாடு.
மரத்தில் இருந்த குருவிக்குஞ்சு தாயைக் கேட்டது.
" ஏனம்மா மாட்டுக்கு நம்மைப்போல் சிறகு இல்லை ? "
தாய்க்குருவி சிரித்தது.
" மாட்டுக்கு நம்மைப்போல் சிறகு தேவையில்லை " என்றது தாய்...
தாய்க்குருவி சொன்னது

" வானத்தில் புல் முளைத்தால் மாட்டுக்கும் சிறகு முளைக்கும் "